2022.8.11-C│愛情公寓交友網站與聊天室

還沒登入愛情公寓嗎？還沒加入愛情公寓嗎？馬上進入公寓和 10,499,363 個住戶交朋友～

紅包抽抽樂！小資變土豪！

素人也能成為明日之星！

移除此區廣告請加入VIP

檔案狀態:

住戶編號:2268321

C 的日記本

快速選單

2022.8.7 《前一篇

後一篇》 2022.8.12

回應

給他日記貼紙

給他愛的鼓勵

檢舉

篇名: 2022.8.11
作者: C	日期: 2022.08.11　　天氣: 　心情:

今仔日是八月十一，禮拜四。我佇葛雷多摸非
一透早阿爸阿母就起來矣，阿母佇灶跤款煮欲拜拜。
昨昏拜三，本來下晡我講欲去全聯買物件通拜拜，
結果阿姐來，阿母叫我去排，伊欲看電視。
一下晡我攏咧排，就無去買。
去囡仔下課，閣佇校園內底耍，陪伊走運動埕，
伊熟似一个仝班的同學，算是伊佇新學校的第一个朋友矣。

食暗頓了，阿爸阿母講欲去全聯。結果煞落大雨。
驚明仔載透早買袂赴，嘛是沃雨開車載伊去較遠彼間，因為隔壁就是果子行。會當作伙買。
暗時落大雨開車，對我這个中年歐吉桑來講，心內誠齷齪，但閣無法度。

先買果子開欲成千箍，閣去全聯，買千外箍。家哉有伊佇疫苗時送的禮券，補貼五百。
轉去了，太太咧畫圖，囡仔猶未洗身軀
伊講欲予我抱抱洗。

洗了換我洗，伊煞無練琴，咧耍玩具
太太伊講囡仔咧等我才欲練。
太太先共伊勾耳空屎，愛我抱咧。
囡仔誠驚，太太手誠猛，一時仔就共上佇要大塊的夾出來，
幾仔日矣，前兩三日囡仔攏會驚，攏夾細塊仔、幼幼仔爾。

下晡我問阿姐謝古錐細漢敢有參加噗噗嚕檢定？
伊講無，因為伊知影以後無欲行這條路，所以予學歡喜的就好
阿姐真正較摮教囡仔。

真正的教育，應該是予伊學歡喜的較會久長
若傷緊求效果，驚是揠苗助長。
人和機器無像，就是人有情緒想法，毋是販賣機，擲錢就有物件落落來。

毋過太太是實用主義派，伊愛要求付出就愛有效果。
其實伊是驚囡仔貧惰，揣一大堆理由毋練，逐項代誌貧惰，以後就抾捔。像我仝款。

8/8拜一爸爸節，我先載阿爸阿母去門診，閣去摸非，了後伊敲電話叫我，我閣去載
中晝訂披薩，結果阿兄佮謝古錐無來食。
下晡阿爸阿母阿姐排，我家己佇樓跤共壁跤烏色的部分噴漆補色了，
閣夯梯擦電風吊扇，尾仔閣共物件攏收收咧，揉塗跤才起去
算工課告一段落。
下晡太太較我提早接囡仔，伊講囡仔講今仔日欲較早下課去大遠百耍吸石玩具
我想欲歇睏一下攏袂使，太太無歡喜，講伊去接就會使
結果我嘛去，太太已經佇遐等囡仔矣。
去大遠百十七樓耍，順紲看另日欲買啥物予阿妹的兩个囡仔。
結果嘛是去六樓買玩具。
轉來囡仔送我一張伊畫的平安竹予我，祝我爸爸節快樂
我誠感動，這是伊第一擺畫竹仔閣寫平安竹，我感覺心意誠重要。

8/9拜二，我袂記阿爸閣愛門診，摸非了就起去叫囡仔起床
阿爸叫電我予我我攏毋知，等我去囡仔落去，伊就出門矣。尾仔我才想著，誠歹勢。

下晡太太閣叫我較早接囡仔，伊欲取去收驚。
囝仔猶會發燒，想欲問看覓咧
結果師父講莫看電視傷久，食寡冰的無要緊。
較囡仔莫歹性地。開兩張符仔洗身軀。
了後太太閣載去海邊碼頭耍轉去。

8/10拜三，看著網友的日記，一篇一篇看落去，誠有感覺
摸非轉去了，載阿母去園裡欲接阿爸，阿爸已經佇車牌仔咧等接駁車矣
還頭轉去，經過橋仔頭，第一擺斡位遮來，感覺誠好，想欲買佇遮徛，毋過無錢矣
本來中晝想欲買鴨肉飯，毋過無開，
因為中晝頓，心內總是和阿母有礙虐，規氣無愛另外買矣，就綴伊食糜就好。

我是毋是對阿爸阿母無耐性矣？
阿母攏用以早的經驗來面對每一日。這馬才開始欲學新時代的做法
親像中晝頓、去全聯的代誌。
我應該愛更較有耐心去體貼伊的想法，慢慢陪伊行出來。
伊才會當體會，才會當調整。
我是按呢對阿爸，嘛愛按呢對阿母。嘛愛按呢對囡仔佮太太。
查甫人咧悿，就悿按呢爾啦。

標籤:

瀏覽次數:122 人氣指數:322 累積鼓勵:10

切換閱讀模式

回應

給他日記貼紙

給他愛的鼓勵

檢舉

給本文愛的鼓勵：